Sentyabrın 7-dən 9-dək Bakıda “Söz və ifadə azadlığına ictimai dəstək” forumu keçiriləcək. Foruma “Freedom House”, “Article 19”, “Sərhədsiz reportyorlar” və başqa nüfuzlu beynəlxalq təşkilatların rəhbər nümayəndələri, dövlət orqanları təmsilçiləri, vətəndaş cəmiyyəti fəalları, jurnalistlər qatılacaq.Forumun ilk iki günündə söz və fikir azadlığına həsr olunmuş kitab, foto və karikatura sərgisi keçiriləcək. Digər tədbirlər, o cümlədən "Frontlayn" (ön xətt) jurnalist diskussiya klubunun açılışı olacaq. Tədbirin son günündə beynəlxalq konfrans keçiriləcək. Konfransda tanınmış xarici və yerli ekspertlər, jurnalistlər, ictimai xadimlər, dövlət orqanlarının nümayəndələri və bir sıra iri beynəlxalq təşkilatların rəhbərləri iştirak edəcəklər.
Tədbirin təşkilatçılarından biri olan Azərbaycan Avrointeqrasiya Milli İctimai Komitəsi,  forum çərçivəsində keçiriləcək sərgiyə cavabdehdir. Sərgi sentyabrın 8-i saat 12.00-da “Landmark-Bakı”otelinin Rotunda zalında açılacaq. 20-dək karikatura, 25 foto və 100-dək kitab sərgiləmək planlaşdırılır.
Forum Azərbaycanda söz və ifadə azadlığının inkişafındakı xidmətlərə görə xüsusi mükafatın təqdim olunması ilə başa çatacaq. Laureatı əvvəllər məhkəmə çəkişmələrinə məruz qalmış və peşə fəaliyyəti ilə əlaqədar cinayət məsuliyyətinə cəlb olunmuş jurnalistlər seçəcəklər.

Konfransda Forumun qətnaməsinin, ictimaiyyət və dövlət qurumları üçün fikir azadlığının inkişafına dair təkliflər və tövsiyələr paketinin qəbulu gözlənilir.

http://www.youtube.com/watch?v=Z33eWMvOqro